oleh

Jemen Mutasi (Syair Gayo)

Oleh : Syukri

Ini nge kona ku jemen mutasi
Dele male i geseri pajabat lama
Enti renye uwes bier minah kursi
Ike langkah ini turah berate rela

Ke paitpeh ungke ike lemakpeh kemili
Gere tentu lungi asam kedangsa
Gelah begegantin namat kendali
Periode segermi itetah ko mien cara

Enti entap ni jabatan reye timul iri
Was ni sistem Demokrasi oya soal biasa
Untung urum tuah tergantung rizki
Enti renye entap ni kursi besiku mata.

Pejabat si nge i lantik ume hasil loby
Ta kadang pakeni dele nge berjasa
Turah mehne oyapeh i pekeri
Kati enti puren deba mugerola.

Kadang mera mutetah isi ni Gayoni
Oya kati i ganti pejabat si mokota
Pejabat ayu enti renye goyang kaki
I lanjutngkomi program si ara.

Enti oloktu tangisi munamat kemudi
Kadang nopor gigi gere len terbiasa
Inget salah jujung ike ume nemah diri
Ta kase muliki siku urum saka.

Buge mi puren Gayo Lues berubah
Kati enti neh susah Rakyat jelata
Enti kase lale njelen amanah
Inget i jema semelah urum kaum janda

Si karena Oya termasuk Visi Misi ni bupati
Ike ingker janyi akire mera bahaya
Kepercayaan ni jema enti khianati
Kati sawa puren rege diri tetap ara.

Blangkejeren 05-04-2018

Komentar

Tinggalkan Balasan

Alamat email Anda tidak akan dipublikasikan.

News Feed